LAOAG CITY – Nagun-od ti Ilocos Norte ti maika-sangapulo ket lima a puesto kas Most Competitive Province iti 2021 Cities and Municipalities Competitiveness Index wenno CMCI Survey nga insayangkat ti Department of Trade and Industry.
Inawat a mismo ni Gob. Matthew Marcos Manotoc ti “plaque of recognition” ken “certificate” nga inpaay ti nadakamat nga ahensia.
Segun kenkuana, dakkel a pakaidayawan ti probinsia ti panagbalinna a maika-sangapulo ket lima kadagupan dagiti wallopulo ket maysa a probinsia iti intero a pagilian.
Inbatadna a ti napateg ket adu a probinsia ti inabak ti Ilocos Norte ken namnamaen ti gobernador a ngumato pay ti puesto ti probinsia kadagiti sumarsaruno a tawen.
Inlawlawagna a kalpasan a naisentro ti imatang ti probinsia iti salun-at ket mapan iti benneg ti ekonomia, trabaho ken “livelihood” kadagiti sumarsaruno a gundaway.
Inbunannagna a makitaripnong kadagiti pannakabagi ti DTI iti mabiit tapno masigurado a maiyallubog dagiti tignay nga isayangkat ti probinsia iti programa ti ahensia.
Innayonna a nagasat ti Ilocos Norte iti kaadda dagiti pannakabagi ti DTI ditoy probinsia a mangipapaay ti naiget a suporta kadagiti amin a ganuat ti probinsia.
