LAOAG CITY – Ibilang ti Philippine National Police a nagtalinaed ti linak, urnus ken talna iti Ilocos Norte ita a panawen ti eleksyon.
Daytoy ti inbatad ni Police Lt. Col Jephre Taccad, ti mangidadaulo iti Provincial Operation Management Unit iti Ilocos Norte Police Provincial Office maibasar metlaeng kadagiti report nga idandanun kadakuada dagiti police stations iti intero a probinsya kabayatan ti panagmonitor da kadagiti maiyus-uswat a campaign rally, ken house to house campaign.
Innayon na nga agpapan ita ket awan pay dagiti namonitor da a nabukel wenno mabukbukel a private armed group.
Nupay kasta, inpasingked ni Taccad nga itultuloy da latta ti naiget a panagmonitor da kagiddan iti panagkiddaw da ti tulong ti publiko nga agbantay kadagiti mabalin a panagtaud dagiti armado a grupo ditoy probinsya a mabalin a mausar para iti 2025 midterm elections.
