LAOAG CITY – Pinirmaan ni Governor Matthew Marcos-Manotoc ti Executive Order (EO) 65-20 para ti pannakaikabil iti total lockdown ditoy Ilocos Norte gapu iti coronavirus disease 2019 wenno covid-19.
Iti babaen ti EO, awan ti siasinno man nga indibidual a mapalubusan a sumrek ditoy probinsya malaksid kadagiti addaan ti official duties; malimitaran ti delivery ken cargo, accredited health workers, peace and order personnel, ken dagiti addaan ti otorisasyon ti gobernador laeng manipod alas-singko ti bigat agingga iti alas-otso ti rabii.
Inbatad pay ti gobernador a mapalubusan dagiti residente a rumuar ditoy Ilocos Norte ngem makasubli danto laengen kalpasan ti lockdown.
Maipawil payen ti mapan iti sabali nga ili wenno ciudad ditoy probinsya.
Inpakaammo pay ti gobernador nga inbilin na kadagiti local chief executives a mangidesignar da ti market places wenno groceries iti kada barangay.
Aminado ti gobernador a narigat ti sitwasyon ngem kiniddaw na ti kooperasyon dagiti umili para met laeng iti pagsayaatan ken kinatalged iti intero a probinsya.
Iti agdama, nagtalinaed ti Ilocos Norte kas kakaisuna a Covid-19 free iti Rehiyon Uno.
