LAOAG CITY – Maladingitan ni Provincial Veterinarian Dr. Loida Valenzuela a nangipakaammo nga uppat dagiti kaudian a kaso ti “rabies” ditoy probinsia.
Segun kenkuana, dua ti nakagat iti aso nga adda rabies na iti arinunus ti tawen 2022 ken dua iti nasapa a paset ti agdama a tawen 2023.
Inbatadna a dua kadagitoy ti manipud iti ili a Badoc ken dua iti siudad ti Batac.
Mainaig iti daytoy, inpakaammona a mangisaysayangkaten iti Siudad ti Batac ti “massive vaccination” kontra iti rabies ken adda metten ti petsa nga intuding iti ili ti Badoc para iti pannakaiyuswat ti maiyasping nga aktibidad.
Inlawlawagna nga inawat pay dagitoy ti partisipasyon ti maysa kadagiti katulunganda iti “animal industry sector” a nangidiaya ti itutulongda a mangisayangkat ti panagbakuna.
Mainaig iti daytoy, inpadanonna ti napalaus a panagyamanna iti kaadda dagiti pribado nga industria a tumultulong kadagiti aktibidad ti Municipal/City/Provincial Veterinary Office.
Kuna ni Valenzuela a saan dagitoy a kabaelan dagiti requirements iti tunggal ili.
Kunana a daytoy ti rason nga inlungalongna ken ni Gob. Matthew Marcos Manotoc iti pannakaipatungpal ti “augmentation” wenno “counterpart strategy” wenno gumatang dagiti munisipio ti bakuna ken gumatang met ti probinsia ti mainayon iti bakuna a kasapulanda.
Innayonna a daytoy ti kitkitaenda iti agdama a wagas tapno maaddaan met ti responsibilidad dagiti munisipio.
