LAOAG CITY – Kinumpirmaran ni Senior Board Member Dr. Medeldorf Gaoat, ti Chairman ti Committee on Health and Sanitation ti Sangguniang Panlalawigan nga adda ti inparuk-at ti Department of Health Regional Office nga impormasion seknan iti posible a pannakaipan ti sibubukel nga Ilocos Norte iti babaen ti Modified Enhanced Community Quarantine wenno MECQ.
Segun kenkuana, daytoy ket kas maibasar iti panagtingiting ti DOH Regional Office iti agdama a mapaspasaran a situasion ti probinsia.
Inbatad na a maysa pay a nakita a nagibasaran ti nasao nga ahensia ket ti agtultuloy a panagngato ti bilang dagiti kaso ti COVID-19 a mairekrekord iti tunggal aldaw ditoy probinsia kangrunaan na idi Hulio 6 nga immabot iti nasurok 100 ti nagpositibo iti makapatay a virus.
Malaksid kiti daytoy, kunana a karaman pay iti panangsukisok da ket ti panagngato pay ti bilang dagiti maimalmaldit a pumuspusay gapu iti COVID-19 ditoy probinsia nga umaboten iti 79 kas maibasar iti kaudian a datos ti Gobierno Probinsial ti Ilocos Norte.
Nupay kasta, inlawlawag ni Dr. Gaoat a nasken a matingiting nga ummuna daytoy nga addang ti DOH Regional Office no kabaelan ti Gobierno Probinsial a dumalan manen ti MECQ gapu ta maysa kadagiti kangrunaan a maapektaran iti daytoy ket ti pagsapulan dagiti kailian.
Inlawlawag na a no adda ti umdas a pundo para iti pannakaipadalan ti MECQ ket matingiting a naimbag no ania ti mabalin nga aramiden.
Innayon na nga adda walo a lugar ditoy probinsia ti posible pay a pakaipakatan ti MECQ ngem saan na pay a masinunuo dagiti nasao a lugar kalpasan nga awan kenkuana ti kopya ti listaan kabayatan a maisursurat daytoy a damag.
Immun-una ngem iti daytoy, nangiparuk-aten ni Gob. Matthew Marcos Manotoc ti Executive Order No. 132-21 iti pannakaideklara ditoy Siudad ti Laoag babaen iti Modified Enhanced Community Quarantine wenno MECQ epektibo inton bigat Hulio 10.
