LAOAG CITY – Inpangato ti Philippine Institute of Volcanology and Seismology ti Alert Level 4 iti Taal Volcano idi rabii kalpasan a naaddaan ti phreatic eruption.
Inbatad ti PHIVOLCS a ti kayat a sawen ti Alert Level 4 ket dakkel ti posibilidad a maaddaan ti hazardous eruption.
Segun iti PHIVOLCS, kimmaro ti eruptive activity ti Taal Volcano a nangitunda ti 10-15 kilometro a steam-laden tephra column karaman ti volcanic lightning.
Nairekord pay iti nagsasaruno a panagdayyeg karaman iti magnitude 2.5 ken 3.9 a gingined idiay Tagaytay City ken Alitagtag, Batangas.
Ginutigot ti ahensya iti “total evacuation” iti Isla ti Taal Volcano ken dadduma pay a high-risk areas.
Kabayatanna, sinuspenso ni Presidente Rodrigo Duterte iti klase iti all levels kadagiti pagadalan ken iti opisina ti gobyerno kadagiti lugar idiay Calabarzon, National Capital Region ken Region 3.
Inrakurak ti Manila International Airport Authority (MIAA) a temporaryo a maisardeng ti operasyon ti Ninoy Aquino International Airport.
Mainaig iti daytoy, naiget nga imonmonitor ti gobierno probinsyal ti posible a pannakaapektar ti Ilocos Norte ti dapo nga ipugpugso ti Taal Volcano.
Basar ti impormasyon manipod iti gobyerno probinsyal, maysa ti Ilocos Norte kadagiti lugar nga adda iti babaen ti Ashfall Watch karaman ti North ken Eastern portion ti Quezon, Central portion ti Pangasinan, Aurora, Quirino, Eastern portion ti Zambales, Apayao, Isabela ken Cagayan.
Karaman pay dagiti lugar nga adda iti babaen ti Ashfall Warning ket ti Cavite, Batangas, Laguna, Rizal, Metro Manila, Bulacan, Pampanga, Bataan, Tarlac, Nueva Ecija, Eastern portion ti Pangasinan, Southwestern portion ti Aurora, Nueva Vizcaya, La Union, Benguet, Ilocos Sur, Ifugao, Abra, Mountain Province, Kalinga, Southern portion ti Apayao ken Western portion ti Isabela.
Kabayatanna, nagbalakad ti gobierno probinsyal nga agtalinaed iti uneg ti balay, iserra dagiti tawa ken ridaw ti pagtaengan tapno saan a sumrek ti abo ken agusar ti mask wenno panyo no rumwar.
