LAOAG CITY – Inpasingked ni Mrs. Estrella Baby Sacro iti Environment and Natural Resources Office a saan unay apektado ti Climate Change ditoy Ilocos Norte.
Segun kenni Sacro, nupay Climate Change iti kangrunaan a problema ti probinsia ken ti sangalubungan ket saan unay apektado ditoy probinsia.
Nupay kasta, inbatadna a rumbeng nga agbalin a responsable kadagiti mapaspasangasangan a kalamidad wenno didigra.
Maipalagip a maysa ti Ilocos Norte kadagiti nakipagpaset ti Best Implementer iti Cash for Work Program for Climate Change Adaptation and Mitigation Program iti intero a pagilian.
Daytoy ket kalpasan a napili a Finalist ti Ilocos Norte gapu iti naisayangkat a Joint Annual National Convention ti National Climate Change Commission a naidasar ti programa ti Gobierno Probinsial a pangalay-ay ti Climate Change wenno panagbaliwbaliw ti panawen.
Ditoy nga indasarda ti kangrunaan a proyekto ti probinsia a nairubuat iti babaen ti liderato ni Senador Imee Marcos idi isu pay laeng ti Gobernador ti probinsia ken daytoy ket ti Green Wall Project.
Naapresiar dagiti partisipantes iti presentasionda gapu iti dakkel a kontribusion ti probinsia iti aglawlaw babaen ti panagmula iti naruay nga ektaria a Reforestation Project ken Watershed Areas manipod kadagiti kabanbantayan agingga iti igid ti baybay.
