LAOAG CITY – Inpakaammo ni Mr. Xavier Ruiz, Officer In Charge ti Provincial Tourism Office a nakikammayetda iti Ayala Museum.
Segun kenkuana, napintas daytoy nga addang tapno ad-adda pay a magutigot dagiti turista nangruna ket maibilang a maysa kadagiti kadakkelan ken kapintasan iti intero a pagilian ti Ayala Museum.
Inbatadna a daytoy ti umuna a gundaway a nakibinnuligda iti Ayala Museum a mangtulong kadakuada iti pannakaitandudo ti turismo ditoy probinsia.
Inlawlawagna a babaen iti daytoy ket maitandudo dagiti scale dolls a mangirepresentar ti Philippine Traditional Attire manipud kadagiti nagduduma a period wenno panawen.
Kunana a daytoy ket maysa laeng kadagiti plano ti opisinada para iti Museum Development ditoy probinsia.
Mainaig iti daytoy, inpakaammo ni Ruiz a naiyeskedyul ti doll exhibit inton Oktubre 25 agingga Disiembre 31.
Kabayatanna, inpasingked ti Officer In Charge ti Provincial Tourism Office nga adda ti manamnama a partnership-da iti National Museum ngem saanna pay inbuksilan ti naan-anay a detalye maipanggep iti daytoy a banag gapu ta manarimaan pay laeng ti pannakikoordinarda para iti daytoy.
