LAOAG CITY – Pormalen a nalukatan ti Pinili Visitor Center Ilocos Norte Tourist Triage iti Barangay Darat iti ili ti Pinili kas paset ti panagsagana ti panaglukat ti turismo ditoy probinsya.
Ti pannakalukat ti Pinili Visitor Center Ilocos Norte Tourist Triage ket indaulwan a mismo ni Governor Matthew Marcos-Manotoc, kadwa na da Vice Governor Cecilia Araneta-Marcos, Senior Board Member Medeldorf Gaoat, Provincial Director Pol. Col. Christoper Abrahano ken dagiti kameng ti PNP, Mayor Rommel Labasan, Vice Mayor Meynard Bumanglag ken dagiti kameng ti konseho iti ili ti Pinili, ken dadduma pay.
Inbatad ni Provincial Tourism Officer Ianree Raquel a ti Pinili Visitor Center Ilocos Norte Tourist Triage ti pagiprosesoan dagiti agsangpet a bisita wenno mayat nga umay bumisita ditoy probinsya.
Inbaga na a masapol nga agparehistro nga umuna dagiti turista babaen iti online wenno ti Ilocos Norte.ph. para iti pannakai-schedule ti panagturong da ditoy probinsya.
Innayon na a masapol a dumalan dagiti maseknan iti PCR Test, 48 nga oras sakbay ti panagturong da ditoy Ilocos Norte .
Manamnama nga addan to met ti maestablisar nga Ilocos Norte Tourist Triage iti ili ti Pagudpud ken iti Laoag International Airport (LIA) ditoy ciudad ti Laoag.
Agpapan ita ket awan pay ti nagpa-book a turista a mayat nga umay bumisita ditoy probinsya.
