LAOAG CITY – Nagun-od ti maysa nga Ilokano a taga ili ti Paoay ti maikapat a puesto iti 2026 Asian Canoe Sprint Championships La Olympic Qualification Ranking Event a naisayangkat idiay China.
Segun ken ni Carla Joy Cabungon, nakibinnalubal isuna iti single event iti canoe kayak nga adda ti kaadayo a 200 a metro kontra kadagiti pito nga umaayam manipud kadagiti nagduduma a pagilian.
Inbatadna a dimmalanda ti sumagmamano a bulan iti naiget a panagsanay para iti naindaklan nga sporting event competition.
Inlawlawagna a daytoyen ti maika-walo a daras a panagay-ayamna para iti single event uray miembro isuna ti dragon boat team ti Pilipinas.
Kunana a talloda nga Ilokano ti napagasatan a naipatulod iti naindaklan a kompetision.
Innayonna nga adda iti babaen isuda iti Philippine Sports Commission ken Philippine Olympic Commission no sadinno a dagitoy ti nangibaklay kadagiti ginastosda.
Naammoan a manamnama a makibinnalubal ni Cabungon inton bulan ti Hunio idiay Kazakstan.
Kabayatanna, adda ti agarup 20 a pagilian ti nakipaset iti ay-ayam kas iti Uzbekistan, Kazakstan, China, Saudi Arabia, Vietnam, Thailand, Macau, Pilipinas ken dadduma pay.
