LAOAG CITY – Balligi a nagun-od ni Mr. Denmark Jake Tamayo a residente ti Brgy. 53, Rioeng ditoy siudad ti Laoag ti balitok a medalya para iti kyorugi taekwondo iti 7th Heroes International Taekwondo Championship a naiyuswat idiay Bangkok, Thailand.
Segun kenkuana, agarup 1,500 participants ti nakipartisipar ken dumanon iti 30 a pagilian ti nakipaset iti naindaklan nga aktibidad pakairamanan ti Thailand, Pilipinas, Hong Kong ken dadduma pay.
Inbatadna nga immuna a kinabinnalubalna ti pagilian a Nepal ken maikadua ti pagilian nga India no sadinno agpada nga inabakna isuda.
Inlawlawagna a nangrugi a nagay-ayam ti taekwondo idi Grade 5 pay laeng isuna agingga a naasa ti talentona idi agbasbasa daytoy ti sekondaria ken kolehio.
Kunana a dimmalan isuna ti naiget a panagsanay babaen iti panangisuro ken panangbayabay kenkuana dagiti coach-na.
Mainaig iti daytoy, inpakaammo ni Denmark a saan met a kinnapaspasan ti kasapulan iti panagay-ayam ti taekwondo no di ket diskarte laeng ken urayen laeng ti perfect timing.
Innayonna nga adun dagiti nakisalipanna iti nagduduma a lugar ditoy pagilian ngem daytoy ti umuna a gundaway a nakipaset isuna iti international competition.
Kabayatanna, nagyaman ni Denmark ken ni Ilocos Norte 1st District Rep. Sandro Marcos iti inpaayna a tulong kenkuana tapno naan-anay a makipaset iti nasao a kompetision.
