LAOAG CITY – Naburburak ti imahen ti Mama Mary a naikabil iti paset ti Solsona-Apayao road ti Brgy. Maan-anteng iti ili a Solsona.
Naladingit ni Sangguniang Bayan Member Bob Sacro kalpasan a nakita na ti nawar-waran nga imahen ni Mama Mary iti nasao a lugar.
Kuna na a pinaaramid na ti gruto idi tawen 2012 kalpasan a natagtagainep na ti rupa ni Mama Mary agingga a pinadur-as dagiti barangay ranger officer.
Segun kenni Sacro, immuna a naireport dagiti BRO nga adda ti bettak ti imahen ngem saan da a ninamnama nga tinumtunek dagiti saan a nabigbig a tattao ti nasao nga imahen.
Nupay kasta, inbatad na a kiniddaw ni Father Albano a maipan dagiti parte ti imahen iti simbaan.
Mainaig iti daytoy, inpakaammo ni Sacro a mausar ton ti pondo ti tourismo ti ili da para ti pannakaurnos dagiti nadadael.
Nadakamat na nga adda dagiti immun-unan nga shed iti nasao a lugar a paglinungan dagiti agturturong ngem dagitoy ket napuuran.
