LAOAG CITY – Bimmaba ti 8 a porsiento ti pakabuklan a rice inventory iti pagilian idi Setyembre ita a tawen.
Nairekord daytoy sakbay ti possible a nakaro nga epekto ti El Niño iti produksyo ti bagas iti pagilian.
Basar iti Philippine Statistics Authority (PSA), ti pakabuklan a rice inventory ket 1.91 milyon a metriko tonelada, bimmaba manipod iti 2.07 milyon a metriko tonelada iti napalabas a tawen.
Patta-pattaen ti Department of Agriculture a mabalin a bumaba ti produksion ti bagas iti pagilian iti agarup 700,000 a metriko tonelada gapu iti epekto ti El Niño.
Immunan nga inrakurak ni National Food Authority Administrator Larry Lacson a ti panagbaba ti inventory ti bagas ket mangipalubos iti ahensya a gumatang ti ad-ado nga irik wenno unmilled rice manipod kadagiti mannalon iti panagtultuloy ti panagapit.
