LAOAG CITY – Nagpanawagan ni Senate Minority Leader Alan Peter Cayetano a nasken a saan nga agsardeng ti imbestigasion ti Senado iti flood control scam uray adda ti iwayat nga impeachment trial ni Vice President Sara Duterte a mangrugi inton Hulio 6.
Para ken ni Cayetano, agbalin a selective justice no isardeng ti imbestigasion ti Senate Blue Ribbon Committee nupay adda ti pannakaiwayat ti impeachment trial.
Inlawlawagna a dakdakkel a mapagsasaritaan ti gatad a napukaw gapu iti flood control scandal.
Inpettengna a saan a nainkalintegan nga agpaayab latta manen ti imbestigasion iti flood control scam no adda ti baro nga ebidensia a maidatag gapu ta no agimbestigar ket rumbeng nga isuda ti mangtingiting ken mangibutaktak.
Maipalagip a ni Cayetano ken dagiti kakaduana idi iti mayorya ti nangipasango ti 18 a dati a bodyguards ni dati a Congressman Zaldy Co iti maysa a taripnong iti Senado a nangtalantan iti maipagarup a panangipatulod kadagiti nakamaleta a kickback a flood control projects.
