LAOAG CITY – Idauloan ni House Committee on Public Accounts Chairman ken Bicol Saro Party-List Rep. Terry Ridon ti maiwayat a panagdengngeg a target a maiwayat inton sumaruno a lawas mainaig iti flood control projects.
Inbatad ni Ridon nga umuna a mapaayaban iti panagdengngeg ni Department Public Works and Highways (DPWH) Sec. Manuel Bonoan ken amin a regional directors daytoy.
Inpetteng ni Ridon a masapul a matingiting ti agdama a flood control projects maiyallubog iti pammilin ni Presidente Ferdinand Bongbong Marcos Jr. ken House Speaker Martin Romualdez a “thorough review” iti baet ti mapaspasaran a nalawa a panaglayos.
Innayonna nga apaman a maammoanda ti kondision dagiti amin a flood control projects ket sumarunona a paayaban dagiti kontraktor nga adda iti likudan ti sub-standard a proyekto.
