LAOAG CITY – Namnamaen ni House Committee on Public Accounts Chairman ken Bicol Saro Party-list Rep. Terry Ridon nga ad-adda pay a mapukaw ti talek dagiti Pilipino ken ni Vice President Sara Duterte gapu iti agtultuloy a panangliklik iti panagsungbat.
Reaksion daytoy ni Ridon kalpasan a rimmuar iti damag a 51.5 percent kadagiti Pilipino ti saan nga agtaltalek ken ni Vice President Sara.
Inbatadna a kumaro pay ti kinaawan ti panagtalek dagiti umili iti Bise Presidente agingga a saan daytoy a sumungsungbat kadagiti alegasion kontra kenkuana.
Kunana a mabalin a maitantan dagiti panagdengngeg mainaig kadagiti akusasion kontra ken ni Vice President Sara ngem saan a mabalin a maitantan ti panangkritikar ti publiko iti kinatao daytoy.
