LAOAG CITY – Kumpiansa ti maysa a miembro ti House prosecution team a ni Iloilo Rep. Lorenz Defensor nga awan ti agbalin nga epekto ti imbestigasion ti Ombudsman iti impeachment trial ni Vice President Sara Duterte.
Maragsakan ni Defensor ti napaspas a tignay ti Ombudsman iti singasing ti House Committee on Good Government and Public Accountability a kasoan ni Vice President Sara ken dadduma pay nga indibidual mainaig iti isyu ti saan nga husto a panagusar ti confidential funds.
Mamati ni Defensor a ti addang ti Ombudsman ket saan a mangpakapsot iti impeachment complaint a suportado kadagiti ebidensia nga iprisentar ti prosekusion.
Awan ti makitkita a problema ni Defensor no aggiddan man ti panangtingiting ti impeachment court ken ni Vice President Sara ken ti imbestigasion ti Ombudsman.
Gapu iti daytoy, para ken ni Defensor, nasaysayaat nga ipabus-oy laengen iti Ombudsman ti trabaho daytoy.
