LAOAG CITY – Inpakaamo ni PLt. Col. Rafael Lero, ti chief of police iti PNP Laoag a dagus a nangipatulod kadagiti kameng ti PNP iti maysa a beach resort iti Brgy.37- Calayab ditoy siudad.
Daytoy ket kalpasan a nakita da ti post iti social media a ladawan nu sadino nga ado dagiti nagturong a tattao ken saan a nasurot ti social distancing.
Nu pay kasta, kuna na nga idi nakadanun dagiti kameng ti PNP iti lugar ket bassit ti nakita a tao.
Innayun na nga iti palawag dagiti mangimanmando ti resort, adda dagiti napan idi kalman ti bigat ngem saan nga isu ti nakad-ado.
Mainaig iti daytoy, kuna na a saan pay a masinunuo nu agpayso ti ladawan a naipost iti social media wenno naala daytoy idi awan pay ti pandemiya.
Kabayatanna, inpakaamo na nga indawat na kadagiti kapitan iti coastal area ditoy siudad ti Laoag partilukar iti Brgy. Calayab, Caaocan, ken Gabu ti tulongda tapno maobserbaran ti social distancing kadagiti agturong iti beach resorts.
Innayun na nga iti agdama ket agtultuloy ti panagimbestigar da seknan iti naipost a ladawan.
