LAOAG CITY – Mannarimaan ti pannakibinulig dagiti kameng ti Intelligence Unit kadagiti nagduduma nga ahensya tapno maamwan ti kaadda ni Simeon “Filiw” Naogsan ditoy probinsya.
Daytoy ti inpasigurado ni P/Maj. Jephree Taccad, Chief Provincial Operation Management Unit ti Ilocos Norte Police Provincial Office (INPPO) apaman ti press conference a naangay.
Basar iti impormasyon awan ti kadwa na a natiliw ngem kalikagomda a maamwan no apay nga adda isuna ditoy probinsya ti Ilocos Norte ken no siasinno dagiti posible a kakadwa na.
Inpakammu ni P/Maj. Taccad, a ti naarestar a kameng ti makakannigid a grupo a Naogsan ket agserserbi kas communist terrorist leader ti Ilocos – Cordillera Region ken addaan daytoy iti pito a counts ti murder, maysa manipud iti Ilocos Sur ken dagiti dadduma ket manipud iti Mt. Province.
Mainaig iti daytoy, saanda a mabalin nga ibutaktak ti ayan ita ni Naogsan para met laeng iti seguridad na sipud ta naruay dagiti kaso a sangsangwen na.
Kabayatanna, pinasingkedan met ni P/Maj. Sheryll Guzman spokesperson Ilocos Norte Police Provincial Office (INPPO) a dimmalanen ni Naogsan iti physical and medical examination, idinto a naiwayat iti Municipal Police Station iti ili ti Bacarra ti mugshot ken dokumentasyon ken manamnama a mai-turn-over iti korte a naggapuan na.
Maipalagip a naarestar ti Cordillera People’s Democratic Front Spokesperson Simeon “Filiw” Naogsan, agtawen ti 70, naasawaan, residente iti Barangay Tonglayan, Natonin, Mt. Province iti Brgy. 1, Sta. Rita iti ili ti Bacarra ken immunan nga inbatad ti pamilya na nga adda isuna ditoy Ilocos Norte tapno agpaagas.
