LAOAG CITY – Nakaawat ti bomb threat ti Immaculate Conception Academy wenno ICA iti Barangay 1 Vadez iti siudad ti Batac.
Daytoy ket kalpasan a nakaawat ti mensahe ni Mr. James Paul Acuña y Asuncion, Principal iti nasao a pagadalan manipud iti maysa a facebook account nga agnagan ti “Duard Pollyx.”
Gapu iti daytoy, dagus nga in-report ti Principal iti Batac City Police Station maipanggep iti nasao a banag.
Naiget a nagbantay dagiti otoridad iti aglawlaw ti nadakamat a pagadalan tapno maipasigurado ti kinatalged iti lugar.
Kabayatanna, naammoan nga agarup 2:30 ti parbangon ita nga aldaw ket naduktalan a negatibo wenno awan ti nakita dagiti kapulisan a bomba wenno aniaman a klase ti panagpabettak iti aglawlaw ti Immaculate Conception Academy.
Maipalagip a daytoyen ti maikadua a bomb threat a napasamak ditoy probinsia ita a tawen no sadinno nga immuna iti Mariano Marcos State University kalpasan a nakaawat met ti mensahe manipud iti maysa a facebook account nga agnagan ti “Dumper Chlo.”
