LAOAG CITY –Inbatad ni Manila 6th District Rep. Benny Abante a saan daytoy a madanagan iti dua a petision a naipila iti Korte Suprema nga agpada a mang-kwestionar iti legalidad ti desision ti Senate Impeachment Court mainaig iti 2/3 vote threshold.
Ni Abante ti endorser iti impeachment complaint kontra ken ni Vice President Sara nga agdama a madengdengngeg iti Senado.
Segun ken ni Abante, karebbengan ti siasinnoman, ti kampo ni Vice President Sara a mangipila ti petision iti Korte Suprema, ken kwestionaren ti nagbalin a desision dagiti senator-judge.
Nupay kasta, kampante ti agpam-panday linteg a solido ti nagbalin a basaran ti impeachment court tapno ibaba ti denominator ti threshold ken iraman laeng dagiti senador a makirparpartisipar iti panangusig.
Kunana pay nga umdas dagiti panao-konsultar dagiti dati a mahistrado ti Korte Suprema tapno makabukel ti desision dagiti senatior- judge, a maibasar iti linteg, ken ti jurisprudence.
