LAOAG CITY – Manamnama a marugian ti panagbutos ita nga aldaw, Disiembre 6, seknan iti impeachment complaint kontra ken ni South Korean President Yoon Suk-yeol.
Idi laeng napalabas nga aldaw, innem a partido ti oposision ti nangipila iti reklamo kontra ken ni Yoon kalpasan ti umuna a deklarasionna iti martial law ngem sumagmamano nga oras ket insigida na met laeng nga inikkat.
Gapu iti daytoy, nangorganisar ti gobierno ti South Korea ti plenary session tapno pormal a maipila ti impeachment complaint.
Iti babaen ti linteg ti South Korea, mabalin nga ikkaten ti National Assembly ti presidente no nasurok a 2/3 kadagiti agpanpanday-linteg ti umanamong wenno pabor iti reklamo.
Maigiddan iti daytoy ket ti hearing ti siam a kameng ti constitutional court, no innem a miembro ti pabor iti reklamo, naan-anayen a maikkat ti presidente.
Iti agdama, ti partido ni Pres. Yoon ket addaan iti 108 seats iti National Assembly, idinto nga addaan daytoy ti 300 a miembro.
