LAOAG CITY – Inpasigurado ni San Juan City Rep. Ysabel Maria Zamora a saan nga agbalin a lapped ti impeachment proceedings kontra ken ni Vice President Sara Duterte iti panangsolbar ti kamara de representantes kadagiti national ken global crisis.
Segun ken ni Zamora, vice chairman ti House Committee on Justice, agtultuloy ti panangar-aramid ti Kongreso ti mandato na iti baet dagiti sangsangwen a karit kas ti gubat ken krisis iti enerhiya iti sabali a pagilian.
Inpetteng ti agpanpanday linteg nga adda ti sursuruten a constitutional timeline a 60 session days ti komite tapno ileppas ti panagdengngeg isut gapuna a saan a mabalin nga isardeng da ti proseso.
Kuna na a kabayatan ti pannagna ti kaso iti Committee on Justice, dagiti dadduma a komite ken departamento ti ehekutibo ket agtultuloy nga agtrabaho kadagiti bukod da a trabaho.
Innayon na nga uray naka-recess ti kongreso manipod Marso 21 agingga iti Mayo 3, agtultuloy latta ti panagdengngeg ti komite kalpasan a naikkan da ti otoridad iti plenaryo.
Inrakurak na pay a saan a makalapped dagiti petisyon a naipila iti korte suprema iti agtultuloy a panangtingiting da kadagiti ebidensya ken testimonya.
