LAOAG CITY – Isagsaganan ni Caloocan City 2nd District Rep. Edgar Erice ti impeachment case kontra ken ni Commission on Elections (Comelec) Chairman George Garcia gapu iti maipagarup nga agsusukot a panangallilaw iti publiko ken kadagiti botante.
Segun ken ni Erice nga agtultuloy ti panagulbod ni Garcia maipanggep iti Miru System kalpasan a maipagarup a nai-withdraw ti kontrata ti St. Timothy Construction Corporation (STCC) iti joint venture gapu iti conflict of interest iti koneksion daytoy iti St. Gerrard Construction General Contractor and Development Corporation (SGCGCDC).
Rumrummuar a makalaban ni Pasig City Mayor Vico Sotto ni Sarah Discaya ti misis ni Curlee Discaya nga akinkukua ti St. Gerrard Construction General Contractor and Development Corporation.
Masdaaw ni Erice no apay nga awan iti General Information Sheet ti nagan ni Discaya no daytoy ti akinkukua ti St. Timothy Construction Corporation ken imbes ket ni Migz Juntura ti nakainagan kas Presidente.
Saan nga umiso ti panag-‘abugado’ daytoy iti MIRU nangruna ket saan pay a nausar iti aniaman nga eleksion ti baro a sistema iti sadinoman a pagilian.
Nupay kasta, inbilinna iti Comelec Law Department nga irebisar ti withdrawal ti St. Timothy Construction Corporation, saanen a nakauray pay ni Garcia iti desision ti law department ken daytoyen ti nagdesision nga ikkaten ti St. Timothy Construction Corporation iti joint venture banag a maipagarup a maikanniwas iti paglintegan.
Gapu iti daytoy, nangiyebkas ti panagdanag ni Erice a posible nga agkaproblema iti mapaspasangasangan nga eleksion inton Mayo 2025.
