LAOAG CITY — Saanen a napateg no asino ti mangabak ken maabak gapu ta ti importante ket iwayat ti impeachment kontra ken ni Vice President Sara Duterte ken lippasen daytoy.
Daytoy ti inpetteng ni Tingog Partylist Rep. Jude Acidre no sadinno a kunana a nabayagen nga ur-urayen ti naruay a Pilipino dagiti sungbat ni Vice President Sara iti Articles of Impeachment ken ti Senate Impeachment Court ti umno a venue para iti daytoy.
Inlawlawagna a nupay dagiti Pilipino ket addaan ti nagduduma nga opinyon iti impeachment ket nasken a saan daytoy a maitantan ken malaukan ti pulitika ti proseso.
Kunana nga aniaman ti agbalin a resulta, ti napateg ket makita dagiti umili ti agbalin a desision ket maiyataday iti ebidensia, iti kinapudno ken iti maysa a patas ken naurnos a panagdengngeg.
