LAOAG CITY – Inpasan ni Secretary General Cheloy Garafil ken ni House Speaker Faustino “Bojie” Dy III ti dua nga impeachment complaint kontra ken ni Vice President Sara Duterte.
Iti inparuk-at a rakurak ni Garafil, kunana a dagiti dokumento ket naipasanan idi Huebes ti malem kalpasan a nakumpleto ti opisinana ti resibo ken beripikasion ti reklamo ken endorsements-da.
Nadakamat a ti umuna a verified impeachment complaint ket inpila dagiti miembro ti Makabayan Coalition ken inendorso ni ACT Teachers Party-list Rep. Antonio Tinio, Gabriela Women’s Rep. Sarah Jane Elago ken Kabataan Party-list Rep. Renee Louise Co.
Karaman kadagiti complainants dagiti dati ken agdama a progresibo nga agpanpanday linteg nga isuda France Castro, Arlene Brosas, Liza Maza, Neri Colmenares, Renato Reyes Jr. Raymond Palatino ken dadduma pay.
Inakusaranda ti “betrayal of public trust” ni Duterte gapu iti maipagarup a saan nga husto a panagusar ti confidential funds.
Mainaig iti daytoy, ti maikadua nga impeachment complaints ket inendorso met da Mamamayang Liberal partylist Rep. Leila de Lima ken Akbayan Rep. Perci Cendaña.
Basar iti reklamo, maipagarup a linabsing ni Duterte ti Konstitusion malaksid iti pannakairamanna iti korapsion ken dagiti addang tapno ipadisi ti gobierno, saan a maipalawag a baknang ken panangabuso iti bileg.
Iti rakurak met ni Bicol Saro partylist Rep. Terry Ridon, Chairman ti House Public Accounts Committee ken Justice Committee Member a ti panag-transmit ti impeachment complaint ket manamnama a mairaman iti Order of Business iti plenario sakbay ti Pebrero 9, 2026.
Kabayatanna, posible a baro nga impeachment complaint ti ipila inton Lunes kontra ken ni Bise Presidente Duterte.
Inbatad ni de Lima nga awan ti mangipawpawil iti panangipila kadagiti nayon a reklamo kontra ken ni Duterte.
Daytoy ket gapu ta saan met pay a nai-refer ti immuna a dua nga impeachment complaint iti House Justice Committee.
Kunana a basar iti resolusion ti Korte Suprema a naiparuk-at idi Enero 28, ti opisina ti House Speaker ket addaan ti 10 session days tapno mairaman ti impeachment complaint iti Order of Business iti plenario.
Gapu iti daytoy, inpetteng ni de Lima, mabalin nga aguray no adda pay ti dadduma a mangipila ti kaso ken adda ti nangngegna nga adda ti maikatlo nga impeachment complaint nga ipila inton Lunes.
