LAOAG CITY – Inbutaktak ni Senador Risa Hontiveros a nakasagana nga agpaidasig a para presidente intono 2028 elections.
Nupay kasta, kuna na nga aramiden na laeng daytoy no isuna ti pilyen ti oposisyon kas standard bearer.
Iti forum ti Foreign Correspondents Association of the Philippines, inbatad ni Hontiveros a ti desisyon ket nakadepende paylaeng kadagiti partido ken sektor ti oposisyon.
Kuna na a ti napateg ket ti panagkaykaysa tapno maaddaan ti tsansa a mangabak.
Inrakurak pay ni Hontiveros a nangrugi dan a makisarsarita iti nagduduma a grupo, ngem inpaganetget na a masapol nga adda ti nalawag nga agpapada nga ipapaayan da ti importansya ken saan a basta political nga alyansa laeng.
Kabayatanna, nasaludsud ken ni Hontiveros ti posibilidad a makadwa da ti kampo ni Presidente Ferdinand Marcos Jr. iti baet ti manamnama a panagpaidasig ni Vice President Sara Duterte, ngem insungbat ti senadora a kasapulan da paylaeng ti naan-anay a panagsasarita gapu ta agduduma da ti pammati.
Innayon na nga iti agdama ket nakatutuk da paylaeng kadagiti trabaho iti senado aglalo ket mabalin nga ado pay dagiti mapasamak kadagiti sumaruno a dua a tawen.
