LAOAG CITY – Mamati ni Senate Majority Leader Francis Tolentino a kabaelan a lippasen ti impeachment trial kontra ken ni Vice President Sara Duterte agingga inton Hunio 30.
Inbatad ni Tolentino nga inadalna daytoy ken posible a malpas ti Senado iti panangtingiting ken makaiyetnag ti desision iti maudi nga aldaw ti bulan.
Iti naidatag nga expedited impeachment ti Senador, Hunio 11 ket maestablisaren ti impeachment court ken maipaayan ti sangapulo nga aldaw tapno agsungbat ti respondent a ni Vice President Sara; Hunio 22 ket ag-reply met dagiti prosecutors; Hunio 23 ket maisubmitir ti trial brief a sarunoen ti opening statement iti malem; Hunio 24 ken 25 para iti pannakaiprisentar dagiti ebidensia ti prosekusion; Hunio 25 ken 26 ket pannakaiprisentar met ti depensa; Hunio 27 rebuttal iti nagbaetan ti prosecution ken defense; Hunio 28 maipaayan ti maysa nga oras ti tunggal grupo para iti oral arguments; Hunio 29 closed-door meeting ti impeachment court; ken Hunio 30 ket agdesisionda.
Nupay kasta, tapno maaramid daytoy nga iskedyul ket masapul ti kooperasion ti prosekusion iti babaen ti pananglimitar wenno panangkissay ti articles of impeachment manipud iti pito iti dua tapno maiyalisto ti proseso ti impeachment trial.
Inabisoan ni Tolentino a mabalin a pilien ti prosekusion ti kaso a para kadakuada ket addaanda ti nadagsen nga ebidensia.
Mamati ti Senador nga inton Hunio 30 ket functionally dismissed ti impeachment case ken saanen a mabalin pay a dumanon iti 20th Congress.
