LAOAG CITY – Saanen a nasdaaw ni Davao City Rep. Paolo Duterte ti panagprogreso ti impeachment proceedings kontra iti kabsatna a ni Vice President Sara Duterte.
Nalawag para ken ni Rep. Pulong nga us-usaren ti impeachment nga armas iti panangpulitika imbes nga ilungalong ti panagbalin a patas ken hustisia.
Nagpalagip ni Congressman Duterte kadagiti 54 a miembro ti House Justice Committee a nagbutos a pabor iti impeachment, temporario laeng ti political power-da ita ngem agtalinaed ti panagsungbatda kadagiti umili.
Dinayaw ni Duterte ni Quezon City Rep. Bong Suntay nga agmaymaysa a timmakder kontra iti panagprogreso ti impeachment complaint kontra ken ni Vice President Sara.
Inlawlawagna a nagpakita ti tured ken integridad ni Suntay a saan a nagpadiktar iti pressure uray agmaymaysa laeng isuna.
Kagiddan daytoy ket kinumusta met ni Duterte dagiti nasken nga imbestigaran iti Kongreso ken administrasion a karaman iti trilyon a pisos a flood control corruption nangruna kadagiti immawat ti maleta a kuarta manipud iti gobierno.
