LAOAG CITY – Temporario nga inpawil ti Department of Agriculture (DA) ti panagserrek dagiti tumatayab ken poultry products manipud idiay Maryland ken Missouri tapno malappedan ti panagwaras ti H5N1 bird flu.
Karaman kadagiti maipawil ket ti karne, itlog, piyek ken semilya manipud kadagiti nasao nga estado.
Inbatad ni Department of Agriculture Secretary Francisco Tiu Laurel Jr., masapol a palawaen ti trade restrictions gapu iti alisto a panagwaras ti bird flu idiay Estados Unidos no sadinno adda ti 145 a milyon a manok ti kinasapulanda a papatayen.
Naammoan nga idiay Maryland ken Missouri, adda ti 13.2 a milyon a tumatayab ti naapektaran manipud idi Enero 23 ken 89 a flock ti nagpositibo iti sakit.
Iti babaen ti Memorandum Order No. 7, sinuspenso pay ti Department of Agriculture ti panangipaay ti import clearances para iti poultry manipud kadagiti dua nga estado.
Nupay kasta, mabalin a mapalubosan a makastrek dagiti shipment a naipatuloden no mapaneknekan a pinatay wenno inaramid dagiti produkto 14 nga aldaw sakbay ti umuna a kaso ti outbreak.
