LAOAG CITY – Inlawlawag ni Barangay Chairman Angelus Ulep iti Barangay 18, San Pedro iti ili ti San Nicolas a dimmalan iti swab test ni IN-C1031 gapo ta adda dagiti narikna na a sintomas ti covid-19.
Ni IN-C1031 ket maysa a babai nga agtawen ti 34 ken maysa a market vendor iti nasao nga ili.
Segun kenni Ulep, idi naipakammo kadakuada a positibo iti virus ni IN-C1031 ket dagus da a binantayan ti pagtaengan ti pasyente.
Inpasigurado na met a naiget ti panagbantay da iti pagtaengan ti pasyente ken mangnamnama a negatibo ti resulta ti RT-PCR test dagiti maseknan.
Maianig iti daytoy, kuna ni Mr. Inno Hernando, ti SK Federated President iti ili ti San Nicolas a naiget met ti panagbantay da iti merkado publiko kalpasan ti pannakaipatungpal ti lockdown ken katulungan da dagiti opisyales ti Barangay 3, tanod ken BHW.
Inbatad na a saan laeng a ti merkado publiko ti San Nicolas ti naka-lockdown gapo ta nairaman dagiti kaabay na a sumagmamano a pagtaengan.
Kunana nga agpaot ti tallo nga aldaw ti pannakai-lockdown ti nasao a merkado publiko.
Naamoan a ni IN-C1031 ket aglaklako daytoy ti itlog.
Kabayatanna, kuna ni Hernando a nangipaay da ti tulong kadagiti kabarangayan da a na-lockdown kas iti saglilima a kilo ti bagas, de lata ken dadduma pay.
