LAOAG CITY – Kinumpirmaran ni Dr. Edgar Cabading, ti Municipal Health Officer iti ili ti Badoc a pimmusayen ni IN-C1987.
Ni IN-C1987 ket maysa a lalaki nga agtawen ti 33, APOR kas maysa delivery porter ken residente iti Barangay Pagsanahan Sur iti nasao nga ili.
Segun kenni Cabading, symptomatic ti pasyente ket naadmit iti Mariano Marcos Memorial Hospital and Medical Center iti ciudad ti Batac.
Inbatad na a dimmalan ni IN-C1987 ti antigen test idi simmangpet iti ili ti Badoc ken negatibo ti resulta na.
Nupay kasta, kunana a kalpasan ti tallo nga aldaw ket saan a makaanges ni IN-C1987 isut gapo na a naitaray iti ospital ken dimmalan iti RT-PCR test no sadinno a positibo ti resulta na.
Innayon na dagus met a naitabon ni IN-C1987 iti kamposanto iti ili ti Badoc.
Naamoan a ni IN-C1987 ket isu ti maikadua a pimmusay kalpasan a nagpositibo iti covid-19 iti nadakamat nga ili.
