LAOAG CITY – Kinumpirmaran ni Barangay Chairman Francis Padron iti Barangay 1 iti ili ti Bacarra a pimmusay ni IN-C2483, lalaki nga agtawen ti 63 ken aglaklako iti tiendaan iti nasao nga ili.
Ni IN-C2483 ket maysa a caretaker iti maysa a pagtaengan iti Barangay 1 nga isu met ti pagnanaedan na.
Segun kenni Padron, pimmusay ni IN-C2483 itay parbangon ken ti Municipal Health Office ti nangipakammo kenkuana.
Inbatad na a bayat a nakalockdown ti tiendaan iti Bacarra ket saanen a rimuar ti pasyente ken dagiti laeng uppat a kabbalay na ti exposure na partikular iti asawa, ina, apoko ken manugang na.
Inpasigurado na met a nakabantay da sipud nag-isolate ti pasyente.
Mainaig iti daytoy, kinumpirmaran met ni Barangay Chairman Barangay Mamerto Reyes iti Barangay Macupit iti ili met laeng ti Bacarra a dua kadagiti kabagyan ni IN-C2483 ti dimmalan iti swab test ken maiyur-uray ti resulta dagitoy.
Naamoan manipud kenni Reyes nga addan ti dati a sagsagabaen a sakit ni IN-C2483.
