LAOAG CITY – Inbatad ni Barangay Chairman Rey Ventura iti Barangay Dariwdiw iti ciudad ti Batac nga awan ti nagbaliwan ti sitwasyon ken maar-aramid iti barangay da.
Daytoy ket iti baet nga adda manen ti nagpositibo ti covid-19 a residente iti nadakamat a barangay nga isu ni IN-C70.
Inlawlawag na a ti baro a nagpositibo ti virus a taga Barangay Dariwdiw ket kadwa met laeng ti immuna a nagpositibo a kalugaran da a ni IN-C35.
Ni IN-C35 ket nagawid iti ciudad ti Batac tapno isu ti pagpaagasan na iti sakit na a Parkinson disease ngem daytoy ket naideresto iti ospital ken saan pulos a napan iti barangay da.
Inbaga na nga uray ti kadwa ni IN-C35 a naideklara laeng a positibo ti virus idi rabii a saan pay a nagaw-awid iti barangay da.
Naamoan a ni IN-C35 ken IN-C70 ket nagtalinaed da nga agpada iti Mothering Center iti ciudad ken awan ti napan nangsarsarungkar kadakuada a kapamilya da.
Binalakadan met ni Barangay Chairman Ventura dagiti kabarangayan na a saan da unay nga agdandanag gapu ta saan pay a nagaw-awid da IN-C35 ken IN-C70 iti lugar da.
