LAOAG CITY – Desidido a mangipila ti reklamo ni Mrs. Menchie Martin, ina ti maysa a baro kalpasan a maipagarup a dinangran ni Brgy. Chairman Rod Norman Martin iti Fish Port ti Brgy. 33-B Lapaz ditoy siudad ti Laoag.
Segun kenkuana, kabayatan a nakaidda daytoy iti pagtaenganda ket nagawid ti anakna ken nagipulong a maipagarup a dinangran isuna ni Kapitan Martin.
Inbatadna a napanda dagus iti lugar a nakapasamakan iti insidente ket apaman a nakababada iti naglugananda a motorsiklo ket ditoy met a kimmarit ti Kapitan ken ti kabsatna kadakuada.
Inpalgakna a linayatan isuna ni Kapitan Martin idinto a dinanog met ti kabsat ti Kapitan ti barona agingga a binugbogdan ti anakna isu a napanna met inarakop daytoy tapno maisalakan ti anakna.
Nupay kasta, kunana nga adda ti nangipurwak kenkuana rason a nagsagaba daytoy ti sugat iti nagduduma a paset ti bagina.
Inlawlawagna a dandanida pay inpurwak ti anakna iti Fish Port ngem adda ti maysa a babai ti nangigawid kadakuada tapno saan a maipurwak daytoy.
Kunana nga awan met ti malagipna a dati a susikda a mabalin a mangitunda ti panangdangranda iti anakna.
Naammoan nga agkabagian ti maseknan nga agina ken dagiti agkabsat a Kapitan.
Innayonna nga adda ti sugat ti anakna iti akin-kannigid a matana, ulo, agong, ngiwat ken ti bukotna nga isu ti ang-angalenna iti agdama.
Mainaig iti daytoy, basar iti nagbalin nga obserbasion ni Mrs. Martin ket nabartek ni Kapitan Martin idi napasamak iti nasao nga ti insidente.
Immuna iti daytoy, kuna ti ina ti biktima a dungdungparen ni Kapitan Martin ti kaklase ti anakna a babai babaen iti luganna a kurong-kurong.
Gapu iti daytoy, kunana a nasair ti rikna ti anakna isu a binugkawanna ti Kapitan banag a kinagurana met daytoy rason a dinangranna ti anakna.
Kabayatanna, bayat a maisursurat daytoy a damag ket ikarkarigatan ti News Team ti Bombo Radyo Laoag nga alaen ti takder ti kabibiangan ni Kapitan Martin maipapan iti nasao a pasamak.
