LAOAG CITY – Inrakurak ti baro a nadutukan nga Ombudsman a ni Jesus Crispin Remulla nga adalen na ti reklamo kontra kenni Vice President Sara Duterte mainaig iti maipagarop a saan nga husto a pannakausar ti confidential funds nga agbalor iti P500 million iti Office of the Vice President (OVP) ken P112.5 million iti Department of Education (DepEd) manipud 2022 agingga iti 2024.
Segun kenni Remulla, lukatan da amin ken pagdamagan da amin dagiti addaan ti akem ken akin iggem iti nadakamat a kaso.
Namunganay ti kaso manipud iti rekomendasyon ti House committee on good governance and public accountability a mangipila ti reklamo kontra iti bise presidente.
Idi bulan ti Hunyo, minandar ti Ombudsman ni Duterte ken siyam oay nga opisyal ti DepEd ken Office of the Vice President nga agsungbat iti reklamo.
Nagpila met ti counter-affidavit na ti maseknan ken sinungbatan da dagiti alegasyon.
Maipalagip nga ibatad idi ni Senator Imee Marcos a maikalkalikagom a maipatugaw ni Remulla kas Ombudsman tapno maipabalod da ni Vice President Sara Duterte ken dagiti kaalyado na agingga iti 2028.
