LAOAG CITY – Mangidiaya ti southern Indian state ti Karnataka ti menstrual leave kadagiti amin a mangmangged a babbai.
Babaen iti nasao a pagannurotan, dagiti babbai nga agtawen ti 18 agingga iti 52 nga agtrabtrabaho iti gobierno ken pribado a kompania ket mabalin nga ag-avail ti maysa nga aldaw a menstrual leave iti kada bulan a saanen a kasapulan pay ti medical certificate tapno ma-avail ti leave.
Sakupen iti pagalagadan ti 350,000 agingga iti 400,000 a babbai iti formal sector ngem mapattapatta nga adda ti innem a milyon a domestic workers, daily-wage laborers, ken gig workers kadagiti unorganized sector.
Naammoan a ti konsepto ti menstrual leave ket saanen a baro gapu ta dagiti pagilian kas iti Spain, Japan, South Korea ken Indonesia ket immunan a mangididiaya ti menstrual leave idinto a dagiti sumagmamano nga Indian states ket mangididiaya ti limitado a menstrual leave no sadinno nga iti Bihar ken Odisha ket mangipapaay ti dua nga aldaw iti kada bulan kadagiti government employees idinto nga iti Kerala ket mangipapaay kadagiti university ken industrial training institute staff.
Mainaig iti daytoy, inlawlawag ni Pratibha R, Presidente ti local Garment ken Textile Workers’ Union a dakkel a tulong ti nasao a banag nangruna ket kaaduan kadagiti babbai a garment workers ket maipapaayan ti 11 a leave days iti uneg ti maysa a tawen.
Nupay kasta, marikna dagiti sumagmamano a babbai a narigat a maipatungpal ti nasao a pagannurotan.
