LAOAG CITY – Napan binisita ni Indian Prime Minister Narendra Modi ti lugar a nagswekan ti Air India plane iti Ahmedabad iti western India a nakatayan ti 241 manipud kadagiti 242 a nakalugan iti eroplano.
Kalpasan iti daytoy ket napanna pay binisita dagiti nasugatan iti insidente, karaman ditoyen ti kakaisuna a survivor a maysa a Briton a ni Vishwashkumar Ramesh.
Iti pannakisarsarita ti prime minister ken ni Ramesh, inbatad na a saanna nga ammo no kasanu a nakalasat iti nakaam-ames a trahedya.
Maipalagip a napasamak ti insidente sumagmamano a gundaway kalpasan a nagtake-off ti eroplano nga agturong koma idiay London.
Karaman kadagiti nakalugan iti eroplano ket ti 169 Indian nationals, 53 a Briton, pito a Portuguese nationals ken maysa a Canadian.
Malaksid kadagiti 241 a nakalugan iti eroplano a pimmusay ket adda pay ti walo a kumpirmado a natay iti ground no sadinno nga uppat kadagitoy ket medical students ken dagiti uppat ket kabagyan da nga agnanaed iti pasdek a nagdissoan ti nasao nga eroplano.
