LAOAG CITY – Ad-adda pay a papintasen ti Ilocos Norte Electric Cooperative (INEC) ti serbisyo na babaen iti pananggatang kadagiti baro nga equipment ken lugan.
Segun kenni Mr. Perry Martinez, Assistant General Manager iti kooperatiba, kalpasan ti panangurnos na iti pinansyal ti Ilocos Norte Electric Cooperative ket rumbeng laeng a sumaruno nga urnosenda ti serbisyo nga ipaay da kadagiti member consumers.
Kunana a daytoy ti rason no apay a gimmatang da ti 16 nga L300 ken tallo a man lifter truck.
Malaksid iti daytoy ket adda pay ti sumaruno a bansada a sumangpet intono umay a bulan.
Naamoan a 25 a milyon a pisos ti pondo a nailatang iti daytoy ken naggapo manipud iti napastrek ti kooperatiba.
Inbatad na nga umabot ti 180 a milyon a pisos ti revenue ti kooperatiba a manipud kadagiti nagduduma a pamastrekan da.
Daytoy ket malaksid laeng iti operational expenses nga aprubado ti Energy Regulatory Commission (ERC) a P1.31 ken mai-multiply daytoy iti 40 million iti kada bulan.
Inlawalwag na a karaman ditoy ti paggapoan ti sweldo ken dadduma pay a kasapulan ti kooperatiba.
Inpasigurado na a saan da nga aginot no maipanggep iti serbisyo nga ipaay da para kadagiti member-consumers.
Mainaig iti daytoy, kunana a dakkel a banag nga ado ti lugan ken equipment ti kooperatiba nangruna no adda dagiti didigra ken dagiti unscheduled power interruption.
