LAOAG CITY – Nasapa a pinagalerto ni Assistant General Manager Cipriano “Perry” Martinez III ti Ilocos Norte Electric Cooperative Task Force Bagyong Paolo.
Inbatad ni Martinez a ti kangrunaan nga inalerto na ket ti task force iti “central” ken iti umabagatan a paset ti probinsia.
Karaman ditoy iti ili ti Nueva Era, Badoc, Pinili, ciudad ti Batac, Paoay, Currimao, Banna, Laoag City, San Nicolas, Sarrat, Dingras, Solsona, Marcos, Bacarra ken Piddig.
Mainaig iti daytoy, inpakaammo ni Atty. Athena Nicolette “Nikki” Pilar, chief of staff ti Ilocos Norte Electric Cooperative a naka-standby amin dagiti “line crew” ti koopreatiba kadagiti nadakamat a lugar.
Inbatadna a daytoy ket tapno adda dagiti dagus a mangtarimaan kadagiti maapektaran a linya wenno poste ti kuryente tapno maisubli nga insigida ti supply ti kuryente kadagiti lugar a maapektaran ti bagyo Paolo.
Kabayatanna, kiniddaw ni Martinez ti naan-anay a pannakaawat dagiti Member Consumer Owners wenno MCO’s iti kanito nga ipatungpal ti management ti Ilocos Norte Electric Cooperative ti “preemptive shutdown” iti ania man a linia no kasapulan para iti kinatalged dagiti kakailian.
Nupay kasta, inlawlawagna nga ipakaammo nga umuna ti “management” ti Ilocos Norte Electric Cooperative kadagiti Member Consumer Owners no maipatungpal ti mandatory shutdown.
