LAOAG CITY – Inbutaktak ni Presidential Communications Office (PCO) Secretary Jay Ruiz nga addaan ti leakage wenno panagwaras dagiti sensitibo nga impormasion manipud iti opisinada.
Inbatad ni Ruiz a nasken nga adda ti confidential kadagiti amin a dokumento ken pammilin manipud iti opisinada ngem makarkaruar dagitoy.
Inlawlawagna a daytoy ti rason no apay a nangiruar ti pammilin ni Executive Secretary Lucas Bersamin ti courtesy resignation kadagiti amin a presidential appointee iti nasao nga ahensia.
Kunana a daytoy ket paset ti pammilin ti Palasio a nasken a tungpalen tapno adda ti pannakabalbaliw ti Presidential Communications Office.
Mainaig iti daytoy, segun ken ni Ruiz a saanna kayat a saoen ket manipud iti Presidential Communications Office ti agiwarwaras kadagiti impormasion gapu ta mabalinmet daytoy a naggapu iti ruar ti Palasio.
Malaksid iti leakage ket adda met dagiti intriga ken pammerperdi iti uneg ti ahensia isu a maap-apektaran ti trabaho iti Presidential Communications Office.
Gapu iti daytoy, ginutigot ni Ruiz dagiti empleado ti Presidential Communications Office nga isardengen ti pammerperdi ken tumutok laengen iti trabaho para iti naur-urnos a trabaho iti publiko.
