LAOAG CITY – Agar-aramid ita ti House Committee on Health dagiti addang a mangsolbar iti bumasbassit a paset ti local government units (LGUs) iti pakabuklan a gastosen iti salun-at ti pagilian pakairamanan ti pannakaimandar ti otomatiko a 5% nga alokasion para iti espesial a pundo para iti salun-at.
Kas reaksion iti panagadal nga inawagan a “Philippine Health Sector Performance: An Analysis using the National Health Accounts of 1990-2022” a kinomision ti Unilab Center for Health Policy (UCHP), binigbig ni Rep. Ciriaco B. Gato Jr., Health Committee Chair, dagiti nagduduma a problema ken isyu maipapan iti panangpundo iti salun-at nga agtultuloy a problema ken pangta ti healthcare network iti baet ti panangilungalong ti Universal Healthcare Act.
Iti panagsukisok ti Unilab Center for Health Policy, inbatad da Doctors Michael Mo, Orville Solon ken Alejandro Herrin ti bumasbassit a panaggastos iti salun-at kadagiti Local Government Unit kas maysa a dakkel a karit iti pananggun-od ti pannakaipateg ti serbisio medikal.
