LAOAG CITY – Dead on arrival iti Governor Roque Ablan Senior Memorial Hospital and Medical Center (GRASMH) ditoy ciudad ti Laoag ni Engr. Rommel Dizon, agnanaed iti Brgy. Nagrebcan iti ili ti San Nicolas kalpasan a napaltu-paltugan babaen iti riding-in tandem suspects iti maysa a pasdek negosyo iti paset ti Brgy. 2 iti nasao nga ili.
Iti inisyal nga imbestigasyon, nagturong ti biktima iti lugar tapno gumatang ti sterio ti lugan.
Inbatad ni Police Major Joseph Baltazar, ti chief of police iti ili ti San Nicolas a basar kadagiti tattao a nagsaludsudan da iti lugar, kabayatan a nakatakder ti biktima iti sango ti pasdek negosyo a paglakoan ti accessories ti lugan ket dimteng ti riding-in-tandem suspects no sadinno a bimmaba ti gunman ken ditoy a pinaltugan na ni Engr. Dizon.
Nakataray pay laeng a simrek ni Dizon iti uneg ti pasdek negosyo ngem kinamat ti suspek ken ditoyen a pinaltu-paltugan na ti biktima agingga a naarikukus.
Naitaray ti biktima iti ospital ngem naideklarar a dead on arrival gapu kadagiti sinagaba na a nakana a sugat.
Segun ken ni Baltazar, ti inisyal a tama ti bala ti paltog ti biktima ket agarop lima no sadinno a rumrumuar nga adda ti tama ti barukong ken ngiwatna.
Naamoan a ti gunman ket naka-jacket ti nangisit idinto a ti nangiturong ti nangisit nga XRM a motorsiklo ket naka-grey, ken kalpasan ti krimen ket rumrumuar a nagpadaya iti Escoda Road dagiti suspek.
Agtultuloy ti iwaywayat nga imbestigasyon dagiti otoridad mainaig iti pannakapaltu-paltog a poon ti nakatayan ni Engr. Dizon tapno maamoan ti motibo ken pakabigbigan dagiti suspek.
