LAOAG CITY – Saan a solusyon ti panagsina ti classroom dagiti estudyante a babbai ken lallaki manipod iti Grade 7 agingga iti Grade 12 tapno maliklikan ti nasapa a panagsikog wenno teenage pregnancy.
Daytoy ti inbatad ni Mr. Herdy Yumul, sociologist ken mangisursuro iti Mariano Marcos State University (MMSU) iti ciudad ti Batac.
Inpetteng na a ti kangrunaan a kasapulan ket naan-anay a pannakadisiplina dagiti agad-adal.
Inlawlawag ni Yumul nga adon dagiti wagas a mabalin a pangipakaammuan ti pagkikitan dagiti estudyante, saan laeng nga iti uneg ti pagadalan.
Innayon na nga ado dagiti wagas tapno makapagkikita dagiti agtutubo gapu ta nawaya da nga agkikinnontak babaen ti cellphone ken social media.
Reaksyon na daytoy mainaig iti inlungalong ti National Youth Commission (NYC) a masapol a pagsisinaen ti classroom dagiti estudyante a babbai ken lallaki.
Mamati ni Yumul a saan a sibubukel nga NYC ti akin-nakem iti daytoy no di ket patien na a nakem laeng daytoy ti chairman ti NYC a ni Ryan Enriquez.
