LAOAG CITY – Maipaay ti innem a mobility device kadagiti adda ti rangkap ti bagina ditoy siudad ti Laoag.
Daytoy ti inpakaammo ni Mr. Christoper King Medina, Disability Affairs Officer 4 ti Persons with Disability Affairs Office ditoy siudad.
Segun kenkuana, dagiti mobility device ket manipud iti mobility worldwide babaen ti Children International Philippines a kabinnulig ti lokal a gobierno ditoy siudad ti Laoag.
Inbatadna nga isuda mismo ti agidondonar kadagitoy a banag para kadagiti adda iti rangkap ti bagina ditoy siudad.
Inlawlawagna a nagduduma ti ipapaay dagitoy a tulong kas ti wheelchair ken dadduma pay a kagamitan a makatulong kadakuada.
Kunana a daytoy ket kas sungbat iti kiddawda a kasapulan dagitoy a gamit tapno mapalag-an dagiti inaldaw a karit iti panaggunay a sangsangoen dagiti adda ti rangkap ti bagina ken maipakita iti kaaduan a kabaelanda ti makigiddan kadagiti normal a tao.
Innayon ni Medina a saan laeng ditoy siudad ti Laoag ti serserbian iti nasao nga opisina no di ket adda pay dagiti agappu iti sabali nga ili a mangipaneknek ti naiget a serbisioda.
