LAOAG CITY – Naiget ti panangmonitor dagiti kameng ti Ilocos Norte Provincial Jail ti salun-at ken kasasaad dagiti Persons Deprived of Liberty maipapan iti mapaspasaran a kinabara ti panawen.
Segun ken ni Provincial Warden Edietor Guiang iti Ilocos Norte Provincial Jail, natalged amin ti salun-at dagiti 133 a balud kabayatan ti kaadda dagitoy kadagiti pagbaludan.
Inbatadna a maysa kadagiti wagas nga ar-aramiden da iti baet ti napudot a paniempo ket ti panangipalagip ken panangipatungpal iti proper hygiene.
Kunana a kada lawas ket maipalagip kadagiti balud ti panagdigusda ti mamintallo a daras iti kada aldaw, panaginum ti ado a danum, pannangan kadagiti nasustansia a taraon ken liklikanda nga agipauneg ti taraon a makaitunda ti allergy.
Inlawlawag na a babaen iti daytoy ket maliklikan a makaala ti nagduduma a sakit dagiti balud.
Mainaig iti daytoy, kuna ni Provincial Warden Guiang a naiget ti ipapaay a suporta iti Provincial Health Office no sadinno a tunggal agkiddaw da ti agas para kadagiti balud ket insigida dagitoy a mangipaay.
