LAOAG CITY – Inpakaammo Provincial Jail Warden Benilda Sadian a nagnegatibo iti drug test result dagiti amin a personnel iti Ilocos Norte Provincial Jail, pakairamanan ti dagiti Persons Deprived of Liberty iti Provincial Jail ditoy probinsia.
Segun kenkuana, immunan a naiwayat ti surprise Drug Test babaen iti Department of Health – Center for Health Development Region 1 no sadinno gagem ti Provincial Jail nga agbalin a requirement daytoy tapnu agbalin a drug free control facilities for persons deprived of liberty.
Gapu iti daytoy, maragsakan ni Sadian gapu ta awan dagiti nagbalin a positibo iti naisayangkat a surprise drug test dagiti amin a personnel ken balod iti Ilocos Norte Provincial Jail.
Innayonna a ti nadakamat a surprise drug test ket tinawen a maisaysayangkat babaen iti biang ti Department of Health – Center for Health Development Region 1.
Inpasiguradona nga agtultuloy ti panagbalin a natalged dagiti amin personnel ken balud tapnu awan ti agbalin a parikut ti nadakamat a pagbaludan ditoy probinsia.
Kabayatanna, kinuna ni Sadian a kaadduan kadagiti balod ket sumangsango iti kaso a panagrames, idinto a dagiti sumangsango iti kaso nga illegal a droga ket 25% ti kadagupan ti bilang a 90 nga agdama a balod iti Ilocos Norte Provincial Jail.
