LAOAG CITY – Agtultuloy pay laeng ti naun-uneg nga imbestigasyon ti Philippine National Police (PNP) mainaig iti maw-awat a bomb threat dagiti unibersidad ditoy probinsya.
Karaman kadagiti pagadalan a nakaawat ti bomb threat ket ti Mariano Marcos State University (MMSU), Data Center College of Laoag ken ti kaudian ket ti Northwestern University.
Segun kenni Police Lt. Col. Ryan Retotar, Deputy Provincial Director for Operation ti Ilocos Norte Police Provincial Office, posible a dagiti adda iti likudan dagiti bomb threat ket manglukluko laeng.
Inlawlawag na a asapol nga agridam met dagiti pagadalan mainaig iti daytoy.
Mainaig iti daytoy, inbatad met ni Police Major Mark Jeofrey Juan, Provincial Legal Officer a saan da nga ikonsiderar nga adda ti pakainaigan na dagiti bomb threat ditoy probinsya kadagiti maaw-awat met a bomb threat iti nagduduma a rehiyon.
Nupay kasta, kuna ni Juan nga agtultuloy ti panagimbestigar da tapno maamoan no siasinno ti adda iti likudan iti daytoy.
Maipalagip nga addan ti sumagmamano a bomb threat a naawat ti Mariano Marcos State University, simmaruno iti Data Center College of Laoag ken ti kaudian ket ti Northwestern University.
