LAOAG CITY – Dinadael ti Ilocos Norte Police Provincial Office dagiti nakumpiskar ken naisuko a boga ken dagiti maipawil a paputok mainaig iti pannakaselebrar iti panangsarabo ti baro a tawen iti Camp Capt. Velentin S. Juan ditoy siudad ti Laoag.
Daytoy ket babaen ti panangiyuporda kadagiti maipawil a paputok kas ti kwitis iti drum nga adda ti danumna ken panangpalidlid ti heavy equipment kadagiti boga.
Ti nasao nga aktibidad ket inatendaran da Atty. Gerald Gallardo, Provincial Director ti Department of the Interior and Local Government, Dr. Rickson Balalio, Provincial Health Officer, Mr. Marcell Tabije, mangidadaulo ti Provincial Disaster Risk Reduction and Management Office, Fire Superintendent Roxanne Parado, Provincial Fire Marshal ken dagiti hepe manipud kadagiti nagduduma a police station ditoy probinsia.
Nakumpiskar ti sumurok-kumurang dua a ribu a maipawil a paputok iti intero a probinsia ti Ilocos Norte kabayatan ti panangsarabo ti baro a tawen.
Segun ken ni P/Col. Joemar Labiano, Provincial Director ti Ilocos Norte Police Provincial Office, adda ti pakabuklan a 1,968 a bilang dagiti nakumpiskar ken naisuko a maipawil a paputok.
Inbatadna a manipud iti nasao a bilang, iti ili ti Piddig ti kaaduan nga addaan ti 1,500, simmaruno iti ili ti Dingras nga addaan ti 239, maikatlo iti ili ti Bacarra nga addaan ti 189 ken 39 iti ili ti San Nicolas idinto a maysa ti nakumpiskar a maipawil a paputok iti ili ti Sarrat no sadinno nga agdagup ti 30,170 a pisos ti balor dagitoy.
Kunana nga adda ti 257 ti nakumpiskar a boga manipud kadagiti amin nga ili ken siudad ditoy probinsia nga agdagup ti 33,150 a pisos ti balor dagitoy.
Inpannakkel met ni P/Col. Labiano nga awan ti nairekord a naiwawa a bala, awan ti nagpaputok ti paltog ken awan ti naimaldit a krimen idi Disiembre 31, 2025 agingga iti Enero 1, 2026.
Mainaig iti daytoy, inpakaammo ni Dr. Rickson Balalio, mangidadaulo ti Provincial Health Office a manipud idi Disiembre 21, 2025 agingga iti Enero 5, 2026 ket adda ti 30 a nairekord a firecrackers related injuries no sadinno a dagiti kangrunaan a nagbalin a biktima ket agtawen ti 15, 13 ken ti kaubingan ket agtawen laeng ti 2 a nagsagaba dagitoy ti minor injuries.
Innayonna a bimmaba ti bilang ti nairekord ita a tawen no maidasig iti napalabas a panangsarabo ti baro a tawen.
Kabayatanna, naragsak nga inpakaammo ni F/Supt. Roxanne Parado, Provincial Fire Marshal ti Bureau of Fire Protection ditoy Ilocos Norte nga awan ti nairekord a firecracker related fire incident idi Disiembre 31, 2025 agingga iti Enero 1, 2026 iti intero a probinsia iti kaunaan a gundaway.
