LAOAG CITY – Inpakaammo ni Police Colonel Frederick Obar, ti Provincial Director iti Ilocos Norte Police Provincial Office nga adda dagiti sumagmamano a maaw-awatda a report maipapan iti investment scam ditoy probinsia.
Gapu iti daytoy, nagballaag ni Police Colonel Obar kadagiti umili a sakbay nga ited wenno iyawat ti kuarta iti maysa nga indibidual ket agpanunut a naimbag nga umuna nangruna ket pinagrigatanda ti kuartada.
Segun kenkuana, saan a basta-basta laeng nga agtalek kadagiti tattao nangruna no saanda a nasinged nga agpagayam wenno agam-ammo tapno maliklikan a maluko ken maitaray ti kuarta a nagrigatan dagiti indibidual.
Kunana a nakasagana dagiti otoridad a mangipaay ti tulong ken seguridad tapno maiyadayo dagiti umili iti posible a pannakabiktimada iti scam.
